Menu

வட்டுக்கோட்டைப் பிட்டியம்பதிப் பத்திரகாளியம்மை ஊஞ்சல்.

ஆசிரியர்: கணபதி ஐயர்
பதிப்பாசிரியர்: சங்கரத்தை இந்து வாலிபர் சங்கம்.
பதிப்பிக்கப்பட்ட வருடம் :1939
உசாத்துணை: ஈழத்துத் தமிழ் இலக்கிய வளர்ச்சி

ட்டுக்கோட்டைப் பிட்டியம்பதிப் பத்திரகாளியம்மை ஊஞ்சல் அவ்வூரைச்சேர்ந்த கணபதி ஐயராற் செய்யப்பட்டது. இது எண்சீர் விருத்தப் பாக்கள் பத்துக் கொண்டு விளங்குகின்றது. அவற்றுள் முதல் விருத்தங் காப்புச் செய்யுளாகவும், இறுதி விருத்தம் வாழிகூறும் செய்யுளாகவுமமைய, ஏனைய எட்டும் ‘ஆடீ ரூஞ்சல்” எனப் பத்திரகாளியம்மையின் புகழ்கூறி ஊஞ்சலாட்டுவனவாக அமைந்துள்ளன. ஒவ்வொரு விருத்தத்தின் பின்னும் பத்திரகாளியம்மைக்கான வெவ்வேறு நிவேதனப்பொருள்கள் அச்சான பிரதிகளிற் குறிப்பிடப்பட்டுள்ளன.

பிட்டியம்பதியிற் பத்திரகாளியம்மை சமேதரராய் வீரபத்திரக் கடவுளும் கோயில்கொண்டெழுந்தருளியுள்ளார். அதனாற் கணபதி ஐயர் அவ் வீரபத்திரர் பேரிலும் பத்திரகாளியம்மை பேரிலும் பதிகங்கள் பாடியுள்ளாரென்பர். அவையிப்பொழுது சிதைந்துபோய் இரண்டொரு பாடல்களே கிடைக்கக் கூடியனவாயுள்ளன. அப்பாடல்களும் அப்பதிகங்களுக்குரியன வெனத் தெரியவில்லை. இதன் காப்புச் செய்யுளை கீழே காணுங்கள்.

திருமருவு வாணியிந்த ராணி தாமும்
    தினம்பரவப் பிட்டிநக ரதனின் மேவும்
உருமருவு மாதிபத்ர காளி மீதில்
    உசிதமது ரத்தமிழி லூஞ்சல் பாட
மருமருவு மிதழிமதி யரவஞ் சூடும்
    வள்ளல்பங்கின் மருவுகிள்ளை வசனி யீன்ற
கருமருவு மதவதனப் புரிவெண் கோட்டுக்
    கணபதிகிங் கிணிச்சரணங் காப்புத் தானே.

இவ்வூஞ்சல் 18ம் நூற்றாண்டின் பின்னரைப்பகுதிக்குரியதென்று கொள்வது பொருந்தும். இந்நூலை சங்கரத்தை இந்து வாலிபர் சங்கத்தினர் 1939ம் வருடம் பதிப்பித்து வெளியிட்டார்கள்.