Menu

பாரத தாற்பரிய சங்கிரகம், இராமாயண தாற்பரிய சங்கிரகம்

ஆசிரியர்: சபாபதி நாவலர்
பதிப்பாசிரியர்: ச. சிவப்பிரகாசபிள்ளை
பதிப்பிக்கப்பட்ட வருடம் :1876

யாழ்ப்பாணத்து வடகோவைச் சபாபதி நாவலர் அவர்கள் வடமொழியிலே அப்பய தீக்ஷித யோகிகள் இயற்றிய பாரத தாற்பரிய சங்கிரகம் மற்றும் இராமாயண தாற்பரிய சங்கிரகம் என்கின்ற இரு நூற்களையும் தமிழிலே மொழிபெயர்த்துப் பாடியதே இந்நூற்களாம். இதனை இந்நூற்களின் தற்சிறப்புப் பாயிரங்களால் அறியலாம்.

ஆரியத் துயரப் பதீக்கிதன் முனமறைந்த
பாரதத்தின் றாற்பரிய சங்கிரகத்தை பாடற்
சீரியற் றமிழா லுரைசெய வருள்செய்ய
வீரமும்மதக் குஞ்சரப் பிரானடி விழைவாம்.

இதிகாசங்களான பாரதத்தாலும் இராமாயணத்தாலும் நுதலப்படும் பரம்பொருள் பரமசிவனே என இந்நூல்கள் சொல்லி நிற்கும். பாரத தாற்பரிய சங்கிரகம் தற்சிறப்புப் பாயிரம் நீங்கலாய் இருபது பாடல்களிலும் இராமாயண தாற்பரிய சங்கிரகம் தற்சிறப்புப் பாயிரம் நீங்கலாய் 24 பாடல்கள் கொண்டும் அமைந்திருக்கின்றன. அவற்றிற் சிலவற்றை கீழே காணுங்கள்.

வீடடைதற்பொருட்டு விபீடணன்சரணம் புகுந்தமையின் வேறிரண்டி
னோடுறவைத்தொப்ப நோக்குதல் பொருந்தாதெனி னற்றன்றுயரிராமன்
பீடுடைமாருதியிருவர் மொழியினானும் பிரியமொடங்கவனுரைத் தவுரையினானு
நாடரசாடற்பொருட் டங்கவன்சரணம் புகுந்தமை நன்கறிதலாலே.

அருச்சுனற்கு மனவுறுதியெய்த வோரிதிகாசமத னைக்கண்ணன்
கருத்ததனிற் புந்திமனம்போற் பனவதம்பதிபோற் கற்பித்தேநற்
குருத்தனக் குஞ்சீடனுக்குநிகழ்வ தோர்சம்வாதக் கொள்கையாலே
விரித்துவெளிப்படுத் துரைத்தானதனை யருட்பெருங்கடலே விமலமூர்த்தி

இந்நூல்களை சபாபதி நாவலர் அவர்களின் மாணாக்கர் ச. சிவப்பிரகாசபிள்ளை அவர்கள் 1876ம் வருடம் சித்திரை மாதம் பதிப்பித்து வெளியிட்டார்கள். தென்னிந்தியாவின் துறைசையாதீனத்தார் இராமாயண தாற்பரிய சங்கிரகத்தை 1943ம் வருடம் உரையுடன் பதிப்பித்ததோடு பின்னர் 1951ம் வருடம் பாரத தாற்பரிய சங்கிரகத்தையும் உரையோடு பதிப்பித்தார்கள்.