Menu

நயினை நிரோட்ட யமக அந்தாதி

ஆசிரியர்: நயினை நாகமணிப் புலவர்
பதிப்பிக்கப்பட்ட வருடம் :1930

ந்தாதி நூல்களில் யமகமமைத்து பாடுவது அரிதினும் அரிதாம். பாடும்போது உதடுகள் ஒட்டாதவாறு பாடப்படுகின்ற நிரோட்ட யமக அந்தாதியொன்றை பாடுவது அதனிலும் அரிதாம். நயினை நாகமணிப் புலவரவர்கள், நயினாதீவில் கோயில் கொண்டெழுந்தருள்பாலிக்கும் நாகபூசணி அம்பாளின் மீது பாடிய யமகவந்தாதியே நயினை நிரோட்டக யமக அந்தாதியாம்.

நீரகந் தங்கந் தகைசால் நயினையி நீடரிசே
ராரகந் தங்கந் தரித்தாட் கந்தாதி யலங்கரிக்கக்
காரகந் தங்கந் தனைநேர நாடிய கைதரநற்
றாரகந் தங்கந் தனிற்காட் டிறைதன் சரண்சரண்

எனும் காப்புச் செய்யுளோடு ஆரம்பிக்கும் இவ்வந்தாதி நாகபூசணி அம்பாளின் மீது பக்தியைக் கிளரச் செய்யும் இயல்புடைய முப்பது யமகச் செய்யுள்களால் அமைந்து சிறந்திருக்கின்றது. அந்தாதியின் இறுதிச் செய்யுள் நூற்பயன் இயம்புவதாய் அமைந்திருக்கின்றது. இவ்வந்தாதியின் பாடற் சிறப்புக் காண இந்நூலிருந்து சில விருத்தங்களை கீழே காணுங்கள்.

ஆரந் தரிக்கத் தரியா ரிலைகிள்ளி யர்ச்சனைக்கீந்
தாரங் தரிக்கத் தளையார்கங் காளியென் றஞ்சலிசெய்
யாரந் தரிக்கத் தளிசேர் நயினை அடைந்திடற் கெண்
ணாரந் தரிக்க நடக்கின்ற காலையி னாற்றிடர்க்கே. (4)

ஆற்றங் கரையரிக் கண்ணிய ரேழையி னாளெனச்சென்
றாற்றங் கரையடைத் தாரிடத் தாய்நி னளிநயினை
யாற்றங் கரையகி லாநெஞ்ச நெக்கின ராங்கெனைக்கண்
டாற்றங் கரையனை யாதலை நேர்கில னண்டர்கட்கே. (5)

அண்டத் தினனிந் தழற்கணி நீணயி னைக்கணின்ச
ரண்டத் தினனல் லணியின ராலரி யாற்றெதிரே
ரண்டத் தினனந் தலினயர்ந் தேனை யடாதசண்ட
னண்டத் தினநணி யஞ்சலென் றாதரித் தாளினிதே. (6)

இவ்வந்தாதிக்கு வித்துவசிரோமணி கணேசையர் அவர்கள் சிறப்புப்பாயிரம் சொல்லியிருக்கின்றார்கள். அதனை கீழே காணுங்கள்.

திருவிளங்கு நயினையந் தீவகத்து வாழும்
    தேவியொரு நாகபூ ஷணிதன் மீதே
கருவிளங்கு முயிர்கள் படித்தின்பம் மேவக்
    கணிநீரொட்ட யமகவந் தாதி செய்தான்
பெருவிளங்கு கலைகளெலாந் தெளியக் கற்றோன்
    பெரிதுகவி இயற்கையினிற் பாடும் நாவான்
தருவிளங்கு கரமுடையான் நீதி மிக்கோன்
    காம்போற்றும் நாகமணிப் புலவன் தானே.

இந்நூல் புலவரவர்களே எழுதிய உரையுடன் 1930ம் வருடம் பதிப்பிக்கப்பெற்று வெளிவந்தது.