Menu

கிள்ளைவிடு தூது

ஆசிரியர்: வரத பண்டிதர்
பதிப்பாசிரியர்: இரத்தினேஸ்வரஐயர்

கிள்ளைவிடு தூது காங்கேசன்துறையைச் சேர்ந்த கண்ணியவளை என்னுமிடத்திலெழுந்தருளியுள்ள குருநாத சுவாமிமீது வரத பண்டிதரால் இயற்றப்பெற்றதாகும். இது தூதுப் பிரபந்த இலக்கணத்துக்கு அமைய கலிவெண்பாவாற் செய்யப்பட்டுள்ளது. இதன் காப்புச் செய்யுளடிகளாகிய

கொற்றமிகுந் தெய்வக் குருநாத சாமிதன்மேற்
சொற்றதமிழ்க் கிள்ளைவிடு தூதுரைக்கக் – கற்றுணர்ந்தோர்
நான்முகத்தோன் போற்றுமுக்க ணக்க னருள்பாலன்
றோன்முகத்தோன் றாளே துணை

என்பன இதன் பெயரை வலியுறுத்தும். 216 கண்ணிகளை கொண்ட இத்தூது கண்ணகியம்மன் கோபத்தாலுண்டாகும் அம்மைநோய் முதலியவற்றை ஆற்றவென உருவெடுத்த குருநாதன் பவனி கண்ட பெண்ணொருத்தி, அவன் மேலுற்ற காதலைத் தன் கிளிமூலஞ் சொல்லியனுப்பிக் “குருநாதர் மாலைதனை நீ வாங்கிவா” எனக் கிள்ளையைத் தூதனுப்பிய கதையை கூறுமுகத்தாற் குருநாத சுவாமியின் சிறப்பினைச் சொல்வதாயமைந்துள்ளது.

நின்பவனி கண்டொருபெ ணின்னை நினைந்துநெஞ்சி
லன்பவன லிட்டமெழு காயினா – ளின்பமலர்

மஞ்சரிகள் சூடாள் வரிவிழிக்கு மைதீட்டாள்
விஞ்சுமணிப் பொற்பூண் விதம்பூணாள் – வஞ்சியரோ

டம்மனைபந் தாடா ளன்ன மிவைதொடாள்
தம்மனைமார் தங்களொடு தார்கட்டாள் – செம்மனையிற்

கண்டுயிலா ளென்றெனது காதலெல்லாங் காதிலுற
விண்டுவிண்டு நன்றாய் விரித்தெடுத்துப் – பண்டிங்

கிறுதி பயப்பினு மெஞ்சா திறைவற்
குறுதி பயப்பதாந் தூதென் – றறிவிற்

றிருவள் ளுவருரைத்த செய்யுட் பயனைப்
பெருகநினைந் தச்சமறப் பேசி – முருகுமலர்ச்

சோலைப் பசுங்கிளியே சொல்லுங் குருநாதர்
மாலைதனை நீவாங்கி வா.

இந்நூலினை யாழ்ப்பாணத்து உடுவில் இரத்தினேஸ்வரஐயர் பதிப்பித்திருக்கிறார்கள். சுன்னாகம் அ. குமாரசுவாமிப்புலவரும், நவாலியூர் சோமசுந்தரப்புலவரும் இப்பதிப்பிற்கு சிறப்புப்பாயிரம் சொல்லியிருக்கிறார்கள். குமாரசுவாமிப் புலவர் சொன்ன இப்பதிப்பின் சிறப்புப்பாயிர ஆசிரிய விருத்தத்தை கீழே காணுங்கள்.

கொள்ளுநெறிக் கண்ணியநல் வளையுறையுங் குருநாத குகனார் மீது
தெள்ளியசீர் மறைவல்லோன் வரதனெனும் பண்டிதர்கோன் செய்துவைத்த
கிள்ளைவிடு தூதுபரி சோதனைசெய் தச்சினிடைக் கிளரச் செய்தான்
தள்ளரிய வவன் மரபில் வருரத்தி நேசுரனாந் தமிழ்வல் லோனே.